ភ្នំពេញ៖ រដ្ឋាភិបាលសម្រេចបន្តឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ សម្រាប់ជុំទី៨ ដែលមានរយៈពេល៣ខែបន្តទៀតនៅក្នុងឆ្នាំ២០២២នេះ។
តាមសេចក្ដីសម្រេចចុះថ្ងៃទី១២ ខែមករា ឆ្នាំ២០២២ រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុលោកឧបនាយករដ្ឋមន្ត្រី អូន ព័ន្ធមុន្នីរត្ន បានសម្រេចបន្តនូវកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ សម្រាប់ជុំទី៨ ដែលមានរយៈពេល៣ខែ ពោលគឺចាប់ពីខែមករា ដល់ខែមីនា ឆ្នាំ២០២២ ដោយការបើកផ្តល់ប្រាក់ឧបត្ថម្ភត្រូវធ្វើឡើងក្នុងសប្ដាហ៍ទី៤ នៃខែនីមួយៗ។
ក្នុងសេចក្ដីសម្រេចនោះក៏បានបញ្ជាក់ផងដែរថា៖ «រយៈពេលអនុវត្តបន្តនឹងត្រូវកំណត់ដោយឡែក ផ្អែកតាមសភាពការណ៍វិវត្តន៍ជាក់ស្ដែង» ។
ដើម្បីជួយដល់គ្រួសារក្រីក្រ និងងាយរងគ្រោះក្នុងអំឡុងពេលមានការឆ្លងរាលដាលនៃជំងឹកូវីដ-១៩ រាជរដ្ឋាភិបាលកម្ពុជាបានសម្រេចអនុវត្តកម្មវិធីឧបត្ថម្ភសាច់ប្រាក់ដល់ពលរដ្ឋដែលងាយរងគ្រោះទាំងនេះចាប់ពីថ្ងៃទី២៥ ខែមិថុនា ឆ្នាំ២០២០ ដែលគិតរហូតមកដល់ពេលនេះរាជរដ្ឋាភិាបាលបានចំណាយសាច់ប្រាក់សម្រាប់ឧបត្ថម្ភអស់ជាង៥០០លានដុល្លាររួចហើយ ដែលបានជួយដល់គ្រួសារក្រីក្រ និងងាយរងគ្រោះចំនួនជាង ៦៨ម៉ឺនគ្រួសារ ដែលបានជួយដល់ពលរដ្ឋចំនួនជិត៣លាននាក់៕
